भरपाई

आजीच्या आठवणीतली पोहण्याची नदी,

बिनवासाची बिनरंगाची,

आम्ही दोन पिढ्यांत नासवली!

नळातून येऊ दिली भरभरून आत!

बेसिन, सिंक, संडास, ड्राय बाल्कनी, बाथरूम

सगळीकडून दिली सोडून बिनधास्त!

टूथपेस्टा, शॅंपू, साबण, डिटर्जंट, टॅायलेट क्लीनर,

आणखिन कसले कसले सोपस्कार

आणि फॅक्ट्र्यांची घाण!

आम्हाला पाणी देतं स्वच्छ धरण!

आमच्या आधी नाही कुठलं शहर!

आमची घाण आमच्याइथून ढकलल्याशी कारण!

पुढे असलेल्या गावांचा,

त्या लोकांच्या स्वास्थ्याचा,

विचारही जाऊ दिला वाहून!

त्या पुढच्या गावांमध्ये

आहेत ना शेतकरी,

भाज्या फळं पिकवणारे, मासे पाळणारे…

त्यांची बाजारपेठ म्हणजे आमचंच शहर!

खातो आमचीच नदी आम्ही,

मेडिकल इन्शुरन्स आहेच स्वादानुसार!

आम्ही शिकत नाही धडा तरी 

आपोआप पापं पोटात गेली,

याची देही याची डोळा नुकसान भरपाई!